El siopero de la spesa in Croazia el se slarga verso novi paesi

El siopero dei consumadori contro el caro vita in Croazia che xe partì venerdi pasà no’l se ferma, e anzi repete più forte de prima. Intanto se ga impizà anca i consumadori serbi, bosgnachi e montenegrini.

El siopero dela spesa contro el caro vita in Croazia de venerdi 24 de Genaro el ga fato colpo. Rispeto a una stimana prima, l’istituto fiscal croato el ga registrà un meno 53% de ricavi de le vendite int’ei supermercai. L’iniziativa, portada ‘vanti de parte dei membri de la piataforma Halo, inizialmente la se ga rivolto ai zitadini insodifai pei prezi dei beni de largo consumo tropo alti e pe’la inflazion fora controlo. El siopero però no’l se ferma, anzi, el radopia. El rapresentante de la iniziativa Josip Klemen el ga dichiarà int’una conferenza stampa, riportada de N1 [va al link], che el siopero de ogi no’l se limitarà solo che ai zentri comerciai ma’l sarà slargà, invitando i zitadini a no ciorse niente de niente per tuto Venerdi 31 de Genaro.
Profondamente ispirai dei vizini croati xe partidi, su proposta de la asociazion Efektiva, anca i consumadori serbi, che i ga ciamà un siopero dela spesa compagno a quel croato. Quei che intendi esprimer la su disaprovazion i xe invitai ogi istesso a no’ndar far spesa. Soto tiro ghe xe più de tuto le più grande cadene de supermercai. Fra i più conosui ghe xe Mercator e Lidl, ma anca altri, che i sioperanti i acusa de specular imbastindo prezi tropo alti in Serbia tanto che i istessi prodoti serbi a l’estero i vien rivendui int’ele istesse cadene, ma per meno bori.
Oltra ai croati e ai serbi, ogi se ga mobilità anca i zitadini de Montenegro e Bosnia Erzegovina. Xe interesante vèder come se moverà la question.